Jetëshkrimi:

Ka kryer studimet në Universitetin e Tiranës, Fakulteti i Shkencave Politiko-Juridike, dega drejtësi. Gjithashtu, ka kryer kualifikime brenda dhe jashtë vendit dhe ka një veprimtari profesionale të pasur në fushën e jurisprudencës. Nga viti 1999 deri në vitin 2001 ka krye profesionin e lirë si jurist, avokat i një studioje të tijën ligjore. Pas angazhimit të tij në politikë, ka shërbyer si Sekretar i Përgjithshëm i Këshillit të Ministrave (1997-1999), ministër i Rregullimit të Territorit dhe Turizmit (2002), ministër i Drejtësisë (2003-2005), ministër i Punëve të Brendshme (2017-2018). Ka mbajtur postin e sekretarit për Çështjet e Koordinimit në Partinë Socialiste, anëtar i Kryesisë së Partisë, si dhe Kryetar i Komisionit të Përhershëm Parlamentar për Çështjet Ligjore, Administratën Publike dhe të Drejtat e Njeriut (2013-2017). Ka qenë gjithashtu Kryetar i Komisionit të Posaçëm për Reformën në Drejtësi (2014-2017). Po kështu, ka qenë anëtar i Komitetit të Përbashkët Parlamentar BE-Shqipëri (2013-2017). Drejtues dhe anëtar i disa komisioneve të posaçme hetimore parlamentare (2003, 2006, 2009, etj.).

Jetëshkrimi:

Në vitin 2001, znj. Bushka është diplomuar për drejtësi, në Universitetin e Tiranës, Fakulteti i Drejtësisë. Ajo ka eksperienca pune si koordinatore programi (1998-2000). Ajo është anëtarësuar pranë Dhomës së Avokatëve Tiranë që në vitin 2003. Në vitet 2000-2008 ka punuar si avokate pranë një studio ndërkombëtare ligjore dhe në vitet 2015-2017 ka qenë avokate. Prej vitit 2008 deri në 2015 ka mbajtur detyrën e këshilltares ligjore në Gjykatën e Lartë. Nga viti 2018-2020 ka qenë pedagoge e jashtme në Departamentin e të Drejtës Civile, Fakulteti i Drejtësisë, Universiteti i Tiranës. Që nga muaji shtator 2017 e në vijim, znj. Bushka ka qenë deputete e Kuvendit të Shqipërisë. Gjatë kësaj periudhe ajo ka qenë anëtare e disa komisioneve parlamentare si Komisioni për Çështjet Ligjore, Administratën Publike dhe të Drejtat e Njeriut dhe Komisionit për Punën, Çështjet Sociale dhe Shëndetësinë dhe anëtare e Këshillit të Legjislacionit dhe Këshillit për Rregulloren, Mandatet dhe Imunitetin. Ajo ka qenë anëtare e disa komiteteve të Asamblesë Parlamentare të Këshillit të Evropës. Znj. Bushka ka marrë pjesë në disa programe kualifikimi, ndër të cilat: Programi i avancuar trajnimi mbi administrimin e drejtësisë dhe efiçensën në menaxhimin e gjykatave, Asser Institute, Hollandë (2013 – 2014); Programi i trajnimit vazhdues, Shkolla e Magjistraturës (2008 – 2013); Praktika gjyqësore e Gjykatës Europiane të të Drejtave të Njeriut dhe zbatimi i saj nga autoritetet gjyqësore shqiptare, USAID, 2012; Trajnime të avancuara mbi zgjidhjen alternative të mosmarrëveshjeve, të drejtën familjare, mosmarrëveshjet administrative, të drejtat e njeriut, etj, organizuar nga Dhoma Kombëtare e Avokatisë, ABA/CEELI, Këshilli i Europës, (2002 – 2008), etj.

Jetëshkrimi:

Ka përfunduar studimet universitare në vitin 1990 në Fakultetin e Shkencave të Natyrës, në degën biologji–kimi. Fillimisht ka punuar si arsimtar në disa shkolla 8-vjeçare dhe të mesme. Në vitet 1992-1995 emigroi në Greqi. Ka ushtruar funksionin e Drejtorit të Përgjithshëm të INSIG sh.a, kryetar dhe anëtar i Bordit Ekzekutiv të Shoqërive të Sigurimit të Kosovës (2003-2004). Ka ushtruar edhe detyra të tjera, si: shef kabineti i kryetarit të Bashkisë Tiranë (2004-2007), nënkryetar i Bashkisë Tiranë (207-2009), ka punuar në Bashkinë Tiranë (2004-2009). Në vitin 2017 ka ushtruar detyrën e ministrit të Shtetit për Çështjet Vendore, si dhe ka qenë Koordinator Kombëtar i Antikorrupsionit. Në periudhën 1996 – 2002 ka marrë pjesë në seminare të shumta brenda dhe jashtë vendit për trajnim bankar në depozita, import-eksport, kredinë, kontabilitet, karta biznesi. Nga viti 2009 e në vijim ka qenë deputet i Kuvendit të Republikës së Shqipërisë në legjislaturat VII, VIII, IX, X.

Jetëshkrimi:

Është diplomuar në Fakultetin e Drejtësisë, Universiteti i Tiranës (1999-2003). Ka kryer studimet dyvjeçare pasuniversitare për master shkencor në shkenca penale në Fakultetin e Drejtësisë, Universiteti i Tiranës (2009 – 2011). Mban titullin “Doktor shkencash” në shkenca penale, ndjekur pranë Fakultetit të Drejtësisë, Universiteti i Tiranës. Ka kryer një sërë trajnimesh dhe specializimesh brenda dhe jashtë vendit për çështjet e të drejtave të njeriut, sistemin e drejtësisë, sistemin penitenciar dhe shërbimit të provës, sistemin elektoral, ndihmën juridike për grupet në nevojë, në organizata ndërkombëtare, institucione të Bashkimit Europian, etj. Ka qenë zëvendësministre e Drejtësisë për periudhën maj - shtator 2017 dhe mbajti postin e ministres së Drejtësisë në vitet 2017-2021. Ka ushtruar funksionin e komisionerit në institucionin e Avokatit të Popullit për një mandat 3- vjeçar, ku ka drejtuar Seksionin e Çështjeve të Administratës Publike qendrore dhe vendore (2014-2017). Për rreth dy vjet e gjysmë ka qenë eksperte e Sekretariatit Teknik, të ngritur pranë Komisionit të Posaçëm Parlamentar të Reformës në Drejtësi (2015-2017). Ka qenë aktiviste e shoqërisë civile, duke ofruar një kontribut për më shumë se 11 vjet për të drejtat e njeriut. Përgjatë periudhës 2003–2014 ka kontribuar si drejtuese programesh për programet e drejtësisë, reformave ligjore dhe institucionale, të zgjedhjeve dhe litigimit strategjik të çështjeve të drejtave të njeriut në Komitetin Shqiptar të Helsinkit. Për disa vite është angazhuar si pedagoge e jashtme në Departamentin Penal të Fakultetit të Drejtësisë, Universiteti i Tiranës.

Ka shërbyer si eksperte dhe konsulente në një sërë organizatash vendase dhe të huaja, me fokus të drejtat e njeriut dhe çështjet e drejtësisë, për monitorimin e ecurisë së Shqipërisë në procesin e integrimit europian dhe zbatimit të rekomandimeve të KE-së (2007–2012 Fondacioni Soros), monitorimin e ecurisë së planeve të qeverisë për luftën ndaj korrupsionit të plan veprimeve për çështjet e drejtësisë (2011–2013), për drejtësinë penale për të miturit, masat e sigurisë dhe dënimet alternative, për çështjet penale, litigimit strategjik dhe ndihmës juridike. Është autore e një sërë publikimesh, studimesh kërkimore dhe shkrimesh shkencore në revista juridike vendase dhe ndërkombëtare në fushën e drejtësisë, si dhe lektore në një sërë trajnimesh, konferencash dhe seminaresh në nivel kombëtar dhe ndërkombëtar.

Jetëshkrimi:

Evis Kushi është diplomuar në vitin 1997 në degën Administrim ‐ Biznes (Marketing), Fakulteti i Ekonomisë, Universiteti i Tiranës. Në vitin 2008 fitoi gradën shkencore “Doktor” (PhD) në Ekonomiks-Turizëm, Universiteti “Staffordshire”, Angli. Në nëntor të 2010 fitoi titullin akademik “Profesor i Asociuar,” në Universitetin “Aleksandër Moisiu”, Durrës. Gjashtë vjet më vonë, më 26 korrik 2016, Kushi mori edhe titullin akademik “Profesor” në Universitetin Bujqësor të Tiranës. Evis Kushi e nisi karrierën e saj në vitin 1998 si lektore në Universitetin “Aleksandër Xhuvani”, Elbasan, në lëndët kryesore “Bazat e Marketingut” dhe “Ekonometri” (1998‐2012). Mes viteve 2010‐2012, Kushi mbajti pozicionin e shefes së Departamentit “Ekonomia dhe e Drejta”, Fakulteti i Ekonomisë, Universiteti “Aleksandër Xhuvani”, Elbasan. Në 2012‐2013 shërbeu si dekane e Fakultetit të Ekonomisë, në po këtë universitet. Nga viti 2013 e në vazhdim, Kushi është deputete e Qarkut të Elbasanit në Kuvendin e Shqipërisë, si dhe ka qenë pjesë e Komisionit për Ekonominë dhe Financat. Njëkohësisht, ka shërbyer edhe si pedagoge me kohë të pjesshme në Universitetin “Aleksandër Xhuvani”, Elbasan dhe në Universitetin Mesdhetar të Shqipërisë. Për sa u përket aktiviteteve shoqërore politike, Evis Kushi është anëtare e Partisë Socialiste që prej Marsit 2013 dhe anëtare e Kryesisë së Partisë Socialiste që prej Prillit 2016. Deri në momentin e marrjes së pozicionit të Ministres së Arsimit, Sportit dhe Rinisë(2020) ajo ka qenë Nënkryetare e Grupit Parlamentar të Partisë Socialiste. Ka marrë pjesë në shumë konferenca kombëtare dhe ndërkombëtare, si dhe është autore e bashkë autore e një sërë artikujsh shkencorë në revista brenda e jashtë vendit.

Jetëshkrimi:

Z. Gogu është diplomuar në drejtësi dhe ka një master në të drejtën publike nga Universiteti i Tiranës. Karriera e tij fillon si pastor i asociuar, Bashkësia Rilindja. Ai ka punuar si kancelar në Gjykatën e Rretjot Gjyqësor Tiranë, drejtues i departamentit ligjor në Bankën e Shqipërisë. Ka mbajtur pozicionin e drejtorit të përgjithshëm në Agjencinë Shqiptare të Sigurimit të Depozitave si dhe Drejtor Kombëtar i World Vision, Shqipëri dhe Kosovë dhe Ballkanit Perëndimor. Në vitin 2017 ka qënë zëvendësministër i drejtësisë. Z. Gogu ka mbajtur postin e Kryetarit të Këshillit Bashkiak të Tiranës si dhe Prefekt i Qarkut Tiranë.

Jetëshkrimi:

Ka lindur në Tiranë, më 1 korrik1979. Jorida Tabaku ka kryer studimet universitare për Menaxhim Biznesi, dega Menaxhim, Fakulteti i Ekonomisë, dhe ato Master për menaxhim. Mban titullin Doktotr i Shkencave. Znj. Tabaku ka qenë pjesë e shumë aktivitetve shoqërore dhe politike si: Zv. Ministre në Ministrinë e Integrimit Europian, Kryetare e Komisionit të Integrimit Europian, Anëtare e Komisionit të Ekonomisë dhe Financave, Anëtare e Komisionit të Posaçëm të Reformës në Drejtësi, Koordinatore projektiesh dhe konsulente vendore etj. Deputete e Kuvendit të Shqipërisë nga viti 2013.

Jetëshkrimi:

Dhurata Çupi (Tyli) ka përfunduar arsimin e lartë në degën Juridik dhe një master mbi “Ligjin dhe Administratën publike”. Gjithashtu është duke vazhduar Doktoraturën me temë “Kontrolli procedural gjyqësor mbi aktet e pushtetit vendor”. Ka një eksperiencë të gjatë punësimi si Drejtore e Drejtorisë Juridike pranë Bashkisë Tiranë (2011-2015) si dhe Pedagoge e Jashtme e lëndës “E drejta e qeverisjes vendore” në universitetin jopublik “Iliria” (2011-2013). Ka qenë Kryetare e Agjensisë së Inventarizimit dhe Trajtimit të Pronave Publike pranë Ministrisë së Brendshme (2005-2011) , Përgjegjëse e sektorit të ligjshmërisë në AITPP pranë Ministrisë së Pushtetit Vendor (2002-2005) si dhe Juriste e Drejtorisë Juridike pranë Bashkisë Tiranë (1996-2001). Ka qenë gjithashtu anëtare e GED (Grupi i Ekspertëve mbi Decentralizimin), Kryetare e Aleancës së Grave Deputete si dhe anëtare e disa prej Komisioneve të Përhershme Parlamentare. Po ashtu, Dhurata Çupi është anëtare e Këshillit Kombëtar të PD-së; është nënkryetare e departamentit për pushtetin lokal në PD. Ka qenë kandidate për deputete në qarkun e Dibrës në zgjedhjet e përgjithshme të 2015-ës. Është aktualisht deputete e Partisë Demokratike të Shqipërisë si dhe Anëtare e Këshillit Kombëtar të PD. Prej vitit 2013 drejtuese në Departamentin për Pushtetin Lokal në PD si dhe prej vitesh aktiviste e kësaj partie në nivel lokal.

Jetëshkrimi:

Ka lindur në Korçë, më 3 gusht 1984. Sorina Koti ka kryer studimet universitare për Financë Kontabilitet dhe ato Master për Bankë Financë dhe mban titullin Doktotr i Shkencave “Në Investime Publike”. Znj. Koti ka qenë pjesë e shumë aktivitetve shoqërore dhe politike si: Drejtuese OJF për Zhvillimin Ekonomik, Kandidate për Deputete në vitin 2013 qarku Korçë, Kordinatore Kombëtare në vitet 2014-2017, Anëtare e Këshillit Kombëtar si dhe Anëtare Kryesie Dega Korçë.

Jetëshkrimi:

Flutura Açka është poete dhe shkrimtare. Është diplomuar për Statistikë në Fakultetin e Ekonomisë në Universitetin e Tiranës më 1988 dhe për Gjuhë-Letërsi më 2001 në Universitetin e Elbasanit. Pas studimeve universitare, punoi për disa vite si Ekonomiste dhe Revizore në Ndërrmarjen e Grumbullim Përpunimit Elbasan (1988-1992). Ka punuar gjithashtu si gazetare dhe më pas administratore dhe redaktore e botimeve në Shtëpinë Botuese “ONUFRI” (1993-1998), Gazetën “Fjala e Lirë” (1992-1993) dhe Shtëpinë Botuese “Skanderbeg Books” (2021-në vazhdim). Në vitin 1997 ajo mori çmimin ndërkombëtar “Lira e Strugës” në Netët e Poezisë Strugane ku e ka përfaqësuar poezinë shqipe për disa vite. Në vitin 1998 u zgjodh ndër 13 poetët më të mirë evropianë të gjeneratës së re në konkurrimin për çmimin e madh Tivoli-Europa në Itali. Përfaqësohet me poezitë e saj në pjesën më të madhe të antologjive të poezisë shqipe në gjuhë të huaj dhe poezi dhe cikle të saj janë botuar në shumë gjuhë.

Jetëshkrimi:

Milva Ekonomi ka kryer studimet e larta në Statistikë dhe Ekonomi nga Universiteti i Bujqësor, dhe Master në Administrim Biznesi (MBA) nga Universiteti i Tiranës. Gjithashtu, ajo ka marrë pjesë në trajnime të avancuara në fushën e statistikave ekonomike dhe sociale si dhe të manaxhimit në Byronë e Statistikave të Punës (SHBA), Eurostat (Luxemburg), Istat (Itali). Ka qenë lektore në Universitetin e Tiranës, Universitetit Bujqësor, si dhe në Universitetin “Zonja e Këshillit të Mirë”. Ajo ka shkruar disa botime në nivel kombëtar dhe ndërkombëtar në fushën e statistikave, zhvillimit social dhe ekonomik, si dhe të përkatësisë gjinore. Zotëron shumë mirë gjuhën angleze dhe italiane, si dhe njeh gjuhën franceze. Znj. Ekonomi ka shërbyer si Drejtor i Përgjithshëm i Institutit të Statistikave të Shqipërisë gjatë periudhës 1994-2005, duke kryer një sërë detyrash që lidheshin me ngritjen dhe institucionalizimin e statistikave zyrtare në vend. Ka kryesuar Komisionin Kombëtar të Nomenklaturave dhe ka qenë për dy mandate anëtare e Byrosë së Konferencës së Staticienëve Evropianë KEE/OKB. Në vitin mars 2006, ajo zgjidhet anëtare e panelit të ekspertëve të projektit “PARIS 21” (OECD), ku punon mbi lidhjen e statistikave zyrtare me të drejtat e njeriut. Punon në këtë projekt deri në fund të dhjetorit 2007. Më pas, ajo u përfshi si ekspert kyç në Agjencinë Evropiane për Rindërtim (EAR) në Kosovë, në projektin mbi Mbështetjen në Sistemin Statistikor dhe Përgatitjen e Regjistrimit të Popullsisë në Kosovë 2007–2008. Znj. Ekonomi dha kontributin e saj si Këshilltar Afatgjatë i Statistikave Suedeze (Sida) në Agjencinë e Statistikave të Kosovës, ku punoi gjatë viteve 2008 – 2013, në hartimin e legjislacionit statistikor dhe ndërtimin e Programit Zyrtar të Statistikave Kombëtare. Ajo gjithashtu ka punuar në projekte të ndryshme me agjencitë e OKB-së dhe organizatave të tjera ndërkombëtare si Eurostat, ILO, UNODC, World Bank, Dfid, dhe FMN. Ajo është anëtare e Institutit Ndërkombëtar të Statistikave (ISI) dhe Shoqatës së Staticienëve të Ballkanit. Ajo është një nga themelueset e Institutit Agenda, një qendër kërkimesh ekononomike dhe sociale, e themeluar në qershor të vitit 2006 në Tiranë. Përgjatë viteve, ajo ka dhënë kontributin e saj në lëvizjen e gruas në Shqipëri, duke qenë aktiviste në shumë nisma, por gjithashtu edhe në aksione të shoqërise civile. Ajo ka shërbyer edhe si anëtare e Këshillit Bashkiak të Tiranës për periudhën 2000-2011. Znj. Ekonomi ka qenë zëvendësministre e Shëndetësisë (2013-2016). Në shkurt 2016 ajo u emërua në pozicionin e Ministrit të Zhvillimit Ekonomik, Turizmit, Tregtisë dhe Sipërmarrjes. Prej janarit 2020 ajo ka mbajtur postin si kryetare e Komisionit të Ekonomisë dhe Financave. Në dhjetor 2020 deri në shtator znj. Milva Ekonomi ushtroi detyrën e Ministrit të Bujqësisë dhe Zhvillimit Rural.

Jetëshkrimi:

Z. Erion Braçe ka përfunduar studimet në Universitetin e Tiranës, Fakulteti i Ekonomisë, dega Ekonomi – Financë, në vitet 1990 – 1994. Që prej vitit 1992 e deri më sot, z. Braçe ka qenë pjesë aktive e jetës politike dhe legjislative në Shqipëri. Për një periudhë të gjatë kohore ka ushtruar profesionin e gazetarit dhe redaktorit në gazetën “Zëri i Popullit”, përkatësisht si redaktor në vitet 1993 – 1997 dhe si kryeredaktor i kësaj gazete në vitet 1998 – 2008. Ai ka qenë anëtar i Komitetit të Përgjithshëm Drejtues të Partisë Socialiste që prej vitit 1994, Zëvendëskryetar i FRESSH-it. Z. Braçe është zgjedhur deputet i Kuvendit të Shqipërisë në 7-të legjislatura që prej vitit 1996. Z. Braçe ka qenë anëtar i Komisionit të Ekonomisë dhe Financave prej vitit 1996 në pesë legjislatura dhe kryetar i këtij komisioni në dy legjislaturat VIII dhe IX. Gjithashtu, ka qenë anëtar i komsionit hetimor “Për Çështjen e Prokurorit të Përgjithshëm” dhe kryetar i komisionit hetimor “Për hetimin e shpenzimeve të Buxhetit të Shtetit në dispozicion të ministrive, institucioneve kryesore të varësisë dhe ndërmmarrjeve publike nëpërmjet prokurimeve publike për periudhën 2001 e në vijim”, të ngritura në Kuvendin e Shqipërisë. Ai u emërua Zëvendëskryeministër më 28 dhjetor 2018, post që e mbajti deri në shtator 2021.