JU pyesni dhe NE pergjigjemi

KPP nuk krijon mbivendosje me asnjë nga Komisionet e përhershme të Kuvendit duke përfshirë edhe KKIE si organ këshillimor.

Objekti i veprimtarisë së tij nuk është qëllimi për përafrimin e legjislacionit në kuadër të integrimit europian apo procesi teknik per se, por adresimi i problematikave dhe zgjidhjeve në tre fushat kryesore që përbëjnë edhe thelbin e kuadrit negociator me BE-në dhe kryesorja janë 3 sfida me interes të vecantë për qytetarët dhe të ardhmen e vendit. Ndër të tjera KPP ka për qëllim final vendimmarrjen për propozimin e amendimeve për ligjet ekzistuese ose/dhe ligje të reja.

KKIE sipas rregullores së Kuvendit (nenit 103/2 të saj) por edhe nga praktika e këtyre 4 viteve formohet e funksion në mënyrë krejt të ndryshëm nga Komisionet e përheshme parlamentare dhe nuk rregullohet në mënyrë të njëjtë me to, por për të ka parashikime në një ligj të vecantë. KKIE është një organ këshillimor i cili ka për detyrë që “gjatë procesit të negociatave të anëtarësimit, si pikë kryesore e dialogut civil dhe social, të jap OPINIONE të specializuara, bazuar në konsensusin sa më të gjerë për këtë proces”.

KKIE funksionon si i tillë megjithëse në Kuvend funksionon edhe një Komision i përhershëm parlamentar për cështjet europiane i cili ka një fushë shumë më të gjerë veprimi, mbikqyrje dhe ligjvënëse. Kanë edhe të njëjtë funksionin e monitorimit të procesit të integrimit europian!!. Të dy komisionet janë të drejtuara nga përfaqësues të opozitës. Kuvendi i ka rregulluar me aktet e tij funksionet dhe mekanizmat që përdoren prej cdonjërit prej tyre. (Nenet 19, 103/1 dhe 103/2 të Rregullores).

Ndërsa KPP në organizimin dhe funksionimin e tij është i ngjashëm me Komisionet e përhershme parlamentare me të cilat ndryshon vetëm nga koha e kufizuar e veprimit dhe fusha e posacme e objektit – rëndësia e një cështje të vecantë. (Neni 24 i Rregullores).

Komisioni i posacëm parlamentar ndryshe nga KKIE ngrihet, formohet dhe funksionon mbi bazën e të njëjtave rregulla të parashikuara nga rregullorja e Kuvendit për komisionet e përhershme (Nenet 32 e vijues të saj). KPP ka të drejtën e vendimmarrjes dhe propozimit të nismave ligjore.

Një shembull. Në 2014 u krijua një Komision i Posacëm Parlamentar për Reformën në drejtësi ndërkohë që funksiononte edhe Komisioni i përhershëm parlamentar i ligjeve. Koha provoi dobinë dhe eficensën e kësaj vendimmarrje.

KPP gjithashtu nuk mbivendoset fare me kompetencat e komisioneve të përhershme lidhur me veprimtarinë kontrolluese dhe mbikqyrëse të tyre. Sipas vendimit 50/2024 të Kuvendit, KPP nuk organizon seanca dëgjimore me institucionet e pavarura, përfshi edhe ato të drejtësisë, për qëllime raportimi prej tyre, por vetëm seanca dëgjimore për qëllime konsultimi dhe informimi në funksion të objektit të përcaktuar prej rezolutës dhe vendimit 50/2024 të Kuvendit.

KPP është vetëm duke e koordinuar dhe mbështetur procesin e hartimit të këtij dokumenti të rëndësishëm për këtë reformë thelbësore.

Dokumenti analitik në fakt është duke u punuar nga ekspertët e GENL me mbështetjen e ST, të organizuar në 3 grupe pune sipas 3 shtyllave përkatëse dhe në konsultim me përfaqësuesit dhe ekspertët e përcaktuar nga institucionet shtetërore dhe agjencitë ligjzbatuese respektive që lidhen me aktivitetin e tyre me objektin e punës së përcaktuar nga Kuvendi.

Dokumenti analitik synon një vlerësim / analizë të situatës aktuale në të tre fushat me vlerësimet, gjetjet, problematikat dhe rekomandimet përkatëse për cështjet që duhen trajtuar e zgjidhur.

Do të jetë i pari dokument analitik që përmes një analize kaq gjithëpërfshirëse dhe në mënyrë transversale analizon këto 3 fusha tejet komplekse, në një dokument të integruar të hartuar nga vetë institucionet shqiptare bazuar edhe në gjetjet, faktet, studimet dhe analizat e bëra publike në këto vite nga institucione të ndryshme ndërkombëtare por edhe nga organizatat e ndryshme vendore si dhe të dhënat zyrtare të prodhuara nga institucionet shtetërore.

Baza dhe korniza përcaktuese e këtij dokumenti do të jenë vlerësimet, gjetjet e rekomandimet e dhëna në raportet e ndryshme zyrtare të BE.

Më konkretisht procesi për hartimin e Dokumentit analitik/Analizës do të realizohet:

  1. duke u mbështetur kryesisht në kriteret negociuese të Grupkapitullin 1 “Themeloret”, gjetjet dhe rekomandimet e shprehura në Raportet e BE, raportet screening të dy grupkapitujve, raportet ndërkombëtare në të tre shtyllat, dokumentat politike dhe sektoriale publike, raporteve periodike të organizatave ndërkombëtare, raportet e organizatave të shoqërisë civile, etj si dhe në raportet e ndryshme zyrtare ndërkombëtare e lokale të bëra publike kryesisht në përiudhën 2022 – 2024;
  2. përmes një angazhimi gjithëpërfshirës me institucionet e qeverisjes qendrore dhe vendore, agjencitë ekzekutive e ato publike të pavarura, institucionet e pavarura, grupet e interesit, organizatat e shoqërisë civile dhe vetë opinionin publik.;
  3. përmes një procesi të hapur e të gjerë konsultimi publik, opinioneve e komenteve në faqen web të KPP, Tryezave për tema të caktuara për debat publik, Forumeve publike me qytetarë dhe vecanërisht me të rinjtë e të rejat dhe sidomos me studentët në qendrat universitare publike e jopublike etj;
Dokumenti analitik ka filluar të punohet në tavolinën e ekspertëve qysh gjatë muajit gusht dhe është në proces. Ai do të jetë një dokument pune i GENL deri në fund të muajit nëntor kur dokumenti final do të miratohet në KPP. Së shpejti në faqen web të komisionit do të bëhen publike një përmbledhje e përmbajtjes së secilit prej komponentëve përbërës të 3 shtyllave të tij si dhe cështjet që mendohen nga ekspertët të ngrihen për diskutim publik. Mbi këtë bazë do të organizohen Tryeza publike me profesionistë të fushës dhe grupe të interesit për të dëgjuar opinionet dhe propozimet përkatëse. Gjithashtu draft Dokumenti do t’ju jepet paraprakisht ekspertëve ndërkombëtarë për komentet e tyre lidhur me përputhshmërinë me dokumentat dhe standartet ndërkombëtare të fushës.

KPP synon të realizojë një proces i cili në çdo hallkë të tij, do të mundësojë përfshirjen e aktorëve të interesuar nga shoqëria civile, bota akademike, komuniteti i biznesit, media dhe qytetarët.

Për të siguruar një përfshirje sa më të gjerë në këtë proces Komisioni i Posaçëm do të organizojë Seanca dëgjimore me qëllim konsultimin me institucione të ndryshme si dhe Tryeza debati për tema të caktuara që do të përcaktohen nga ekspertët për të dëgjuar opinionet dhe propozimet e profesionistëve të fushës rreth tyre të cilat do të reflektohen më pas prej tyre në dokumentat përkatës.

Këto tryeza do të organizohen në Tiranë kryesisht, në qendra universitare dhe në qendra qarku me përfshirjen e aktorëve vendorë.

Në faqen Web të Komisionit do të njoftohet Tema e Tryezës, një përmbledhje e dokumentit përkatës, cështjet që do të ngrihen nga ekspertët për diskutim publik. Tryezat do të jenë publike pra do të transmetohen përmes faqes web të Kuvendit por edhe nga mediat nëse do të kenë interes rreth tyre. Nëse dëshironi të merrni pjesë në to mjafton të regjistroheni në faqen web të Komisionit. (shih rubrikat Njoftime dhe Regjistrohu)

Gjithashtu nëse dëshironi të shprehni opinionin tuaj për dokumenta apo cështje të caktuara mund ta shprehni atë edhe përmes faqes web. Opinioni juaj do i bëhet njohur KPP dhe GENL dhe prej tyre do të merrni edhe përgjigjen me reflektimet përkatëse.

Përfshirja në këtë proces e qytetarëve dhe veçanërisht e rinisë universitare, nëpërmjet hapësirave të bashkëbisedimit tematik dhe faqes tonë online të krijuar posaçërisht për këtë qëllim, përbën prioritet të punës së komisionit. Nëpërmjet kësaj faqeje, çdo qytetar ka mundësi që të regjistrohet dhe në varësi të interesit, të marrë informacion në kohë reale për mbledhjet e komisionit, seancat dëgjimore si dhe dokumentat e aktet e ndryshme të hartuara nga ekspertët e komisionit.

Faqja online dhe platforma e komunikimit interaktiv publik, publikimi live online jo vetëm i mbledhjeve të Komisionit, por edhe forumeve të debatit publik si dhe përfshirja e grupeve të interesit në to do ta bëjë gjithë këtë proces tërësisht transparent e gjithëpërfshirës për të gjithë faktorët socialë të interesuar rreth tij.

Ju mund të ndiqni faqen web të Komisionit ku do të gjeni cdo gjë rreth aktivitetit të tij dhe Grupit të Ekspertëve. Gjithashtu mund të regjistroheni në të dhe të merrni në kohë reale ftesat për të ndjekur online aktivitetet publike të tyre si dhe të merrni dokumentat e aktet që keni interest të vecantë.

Gjithashtu përmes rubrikës Konsultim me publikun mund keni një tjetër mundësi interesante. Në këtë hapësirë do të publikohen në mënyrë periodike drafte/propozime/çështje apo iniciativa të ndryshme të cilat do t’i nënshtrohen konsultimit të gjerë me publikun dhe grupet e interesit.

Në këtë rubrikë gjithashtu do të keni mundësinë të adresoni pyetje për ekspertët dhe do të merrni përgjigje prej tyre përmes faqes web ose në email-in tuaj. Komisioni do të programojë zhvillimin e forumeve të dialogut qytetar me publikun e gjerë dhe grupet e interesit në Tiranë e në rrethe dhe kryesisht në mjediset universitare me pedagogët dhe studentët.

Ne jemi të interesuar të kemi një pjesëmarrje aktive të qytetarëve dhe sidomos të rinjve e të rejave në këto evente për t'ju përgjigjur pyetjeve të tyre dhe sidomos për të dëgjuar opinionet, komentet dhe propozimet e tyre rreth cështjeve konkrete të ngritura për diskutim publik si dhe akteve të ndryshme që do të hartohen nga ekspertët.

    Keni një Pyetje?