Miratohet Dokumenti Analitik për Mirëqeverisjen, ekspertët propozojnë 70 masa specifike në 23 fusha

Nën drejtimin e kryetarit, z.Fatmir Xhafaj, u zhvillua mbledhja e radhës e Komisionit të Posaçëm Parlamentar për Mirëqeverisjen, Antikorrupsionin dhe Sundimin e Ligjit, për të shqyrtuar dhe miratuar Dokumentin Analitik që vjen si rezultat i punës së Grupit të ekspertëve të Nivelit të Lartë. Fillimisht u shqyrtua dokumenti analitik për Shtyllën e I-rë, atë të “Mirëqeverisjes”.

Të ftuar për t’iu përgjigjur pyetjeve të deputetëve ishin katër prej anëtarëve të GENL: Prof. Dr. Migena Leskoviku, pedagoge pranë Institutit të Studimeve Evropiane (ISE), Universiteti i Tiranës, Prof. Asoc. Dr. Olta Milova, pedagoge pranë Fakultetit të Ekonomisë, Universiteti i Tiranës, z.Geron Kamberi nga Qendra për Studimin e Demokracisë dhe Qeverisjes dhe z.Marsel Llukmani, nga Biznes Albania.

Anëtarja e komisionit të posaçëm, znj.Milva Ekonomi, në cilësinë e relatores së kësaj shtylle, bëri një përmbledhje të metodologjisë së punës, fazave nëpër të cilat ka kaluar analiza, procesit të konsultimeve dhe diskutimit të tij gjatë 3 Tryezave publike të organizuara gjatë periudhës nëntor-dhjetor, me rreth 150 pjesëmarrës në total, si dhe tre forumeve me qytetarët të organizuara për këtë qëllim me pedagogë dhe studentë në Durrës, Elbasan dhe Vlorë.

Znj.Ekonomi sqaroi se bazuar në gjetjet e analizës dhe marrjes së komenteve nga institucionet e pavarura dhe ekzekutivi, organizatat ndërkombëtare, organizatat e shoqërisë civile, bota akademike dhe biznesi etj, grupi i ekspertëve ka nxjerrë dhe rekomandimet kryesore si dhe drejtimet e mundshme për ndërhyrje, të cilat kanë shërbyer si bazë për ndërtimin e Planit të Veprimit për shtyllën e Mirëqeverisjes.

Znj.Ekonomi informoi se Plani i Veprimit për Shtyllën e Mirëqeverisjes, si draft i parë, parashikon në total 23 Fusha tematike, me 70 masa specifike. Të ndara sipas funksioneve kryesore të Kuvendit rreth 21 masa janë të lidhura me funksioni ligjbërës dhe rreth 49 masa lidhen me funksionin mbikëqyrës dhe kontrollues të tij.

Lidhur me kapitullin për transparencën në administratën publike ekspertët kanë renditur 10 rekomandime, kur ndër to përmendim: Krijimi i këshillave konsultativë të përhershëm pranë Kuvendit me përfaqësues të shoqërisë civile, akademikë etj.; mbështetjen e pushtetit vendor në fushën e digjitalizimit, etj. Sa i takon kapitullit të integritetit dhe etikës në administratën publike, znj.Ekonomi bëri të ditur se GENL ka nxjerrë katër rekomandime kryesore, ku mes tyre renditet nevoja për hartimin e një ligji të ri për shmangien e konfliktit të interesit për personat e emëruar që ushtrojnë funksione publike.

Znj.Ekonomi ndër të tjera bëri më dije se GENL ka rekomanduar edukimin e publikut për rrezikun e korrupsionit dhe kulturën e integritetit, si dhe rritjen e transparencës dhe përgjegjshmërisë në administratën publike për të krijuar një administratë më të hapur.

Sa i takon efektivitetit dhe transparencës në financat publike, znj.Ekonomi u shpreh se janë paraqitur nëntë rekomandime, teksa u ndal veçanërisht te përshtatja e legjislacionit për PPP dhe koncesionet sipas BE, si dhe përfshirja e kritereve të respektimit të mjedisit (prokurimi “green”) në procedurat e prokurimeve publike nëpërmjet identifikimit të numrit të procedurave të prokurimit që reflektojnë kërkesat për efiçencën e energjisë; ngritjen e një Këshilli Fiskal për raportimin e rregullt financiar të ndërmarrjeve shtetërore nëpërmjet metodologjisë së standardizimit, me qëllim reduktimin e risqeve fiskale, etj.

Znj.Ekonomi informoi dhe mbi dakordësinë e arritur me përfaqësues të OGP për forcimin e bashkëpunimit mes MASL në fushën e qeverisjes së hapur dhe transparencës parlamentare, si dhe përfshirjen në analizë të një kapitulli mbi qeverisjen e hapur, i cili është një komponent kyç që lidh dhe koordinon veprimet e tre shtyllave të analizës.

Më pas grupi i ekspertëve iu përgjigj pyetjeve të deputetëve lidhur me transparencën në administratën publike, masat e sugjeruara për rritjen e aksesit në shërbimet publike të ofruara nga pushteti lokal, si mund të adresohen më mirë mekanizmat për të ushtruar funksionin kontrollues dhe monitorues, modelet e marra për krijimin e mekanizmave si portali i perfomancës dhe integritetit në administratën publike, rekomandimet lidhur me rritjen e kapacitetit të administratës së Kuvendit lidhur me analizën buxhetore, mekanizmat për matjen e eficencës së administratës publike në raport me qytetarin dhe rritjen e llogaridhënies, etj.

Pas diskutimeve komisioni i posaçëm miratoi në parim Dokumentin Analitik për Shtyllën e “Mirëqeverisjes”.

Në përfundim të mbledhjes znj.Lefteri Luzi, drejtuese e Sekretariatit Teknik, bëri një përmbledhje të informacionit që do t’i dërgohet Byrosë së Kuvendit lidhur me punën e deritanishme të MASL, kontratat e nënshkruara me ekspertët dhe konsulentët e huaj ndërkombëtarë, etj.