Zhvillohet takimi i dytë i nivelit të lartë “Shqipëria 2030 në BE – Rruga e reformave”

Nën kujdesin e veçantë të Kryetares së Kuvendit, znj. Elisa Spiropali, Kuvendi i Shqipërisë organizoi takimin e dytë të nivelit të lartë “Shqipëria 2030 në BE-Rruga e reformave”.

Në ceremoninë e hapjes morën pjesë Kryeministri z. Edi Rama, z. Bjorn Berge, Zëvendëssekretar i Përgjithshëm i Këshillit të Europës, znj. Valentina Superti, Drejtoreshë për Ballkanin Perëndimor në Komisionin Europian, përfaqësues të trupit diplomatik dhe partnerëve ndërkombëtarë, ministra, deputetë, përfaqësues nga institucionet shtetërore, agjencitë ligjzbatuese, shoqëria civile, ekspertë të Nivelit të Lartë të atashuar pranë Komisionit të Posaçëm, etj.

Në fjalën e saj, Kryetarja e Kuvendit, znj. Elisa Spiropali, nënvizoi rëndësinë e avancimit të mëtejshëm të reformave me qëllim përmbushjen e objektivit për anëtarësimin e Shqipërisë në Bashkimin Europian brenda kësaj dekade.

“Nuk mund të ndërtojmë një Shqipëri europiane pa një Kuvend europian, dhe një Kuvend mund të funksionojë me standarde europiane, vetëm në një shoqëri që i ka edhe vetë këto standarde.

Objektivi ynë për anëtarësimin në familjen europiane në fund të kësaj dekade dhe mbylljen e negociatave teknike brenda vitit 2027 është bërë tashmë publik jo vetëm në Shqipëri, por edhe në institucionet europiane e në vende anëtare, dhe ka fituar, ndër vite e me shumë mund, mbështetjen e tyre të plotë” u shpreh znj. Spiropali.

Duke theksuar rolin që po luan Kuvendi në procesin legjislativ dhe forcimin e mbikëqyrjes, transparencës, llogaridhënies dhe eficiencës, znj.Spiropali nënvizoi se mirëqeverisja është një standard parësor i procesit të anëtarësimit në Bashkimin Europian.

“Kuvendi do të vijojë të udhëheqë me vendosmëri anëtarësimin në Bashkimin Europian, duke kontribuar në mënyrë të veçantë në garantimin e legjitimitetit demokratik dhe fuqizimin e tiparit gjithëpërfshirës të procesit. Në këtë kontekst, do të shqyrtojmë propozimin e ekspertëve për ngritjen pranë Kuvendit të këshillave të përhershëm konsultativë për çështje me interes strategjik kombëtar, duke zgjeruar praktikën e funksionimit të Këshillit Kombëtar të Integrimit Europian.

Do të shqyrtojmë po ashtu rekomandimet dhe nevojën për përmirësimin e legjislacionit për çështje thelbësore të zhvillimit, demokratizimit dhe integrimit europian, modernizimin e Kuvendit të Shqipërisë, bashkëpunimin me institucionet e pavarura dhe fuqizimin e tyre si roje të interesit publik, bashkëpunimin me qytetarët, shoqërinë civile dhe median, rritjen e transparencës së veprimtarisë së Kuvendit, Qeverisë dhe administratës publike”, u shpreh znj.Spiropali duke nënvizuar më tej se Kuvendi do të vazhdojë të mbështesë reformën në drejtësi dhe pavarësinë e institucioneve të drejtësisë, harmonizimin e sundimit të ligjit me respektimin e të drejtave kushtetuese dhe të drejtave themelore të njeriut.

Kryeministri, z.Edi Rama, në fjalën e tij theksoi se vendi duhet të përfitojë nga mundësia aktuale për të mbyllur negociatat deri në vitin 2027, si dhe vlerësoi rëndësinë e Komisionit të Posaçëm parlamentar për konsolidimin e procesit dhe progresit të bërë në funksion të antikorrupsionit dhe sundimit të ligjit, përmes mirëqeverisjes në tërësi.

Kryeministri vuri theksin tek reformat që po zbaton Shqipëria dhe vlerësoi se procesi i negociatave tashmë ka hyrë në një fazë më të avancuar. “Konsolidimi i domosdoshëm i gjithçkaje është në proces pasi gjithçka është ende e kthyeshme, e brishtë, vulnerabël dhe për këtë arsye na duhet BE – me çdo kush dhe çmim. Na duhet të hyjmë në atë derë që është hapur si mundësi jo vetëm reale, por edhe aktuale, e hapur me dhe deri në fund të 2027-s të mbyllim negociatat si vullnet i dyanshëm dhe mund të mbyllet ajo derë nëse nuk e shfrytëzojmë hapësirën e kohës që kemi në dispozicion. Mund të mbyllet, sepse historia e zgjerimit tregon se ajo derë hapet dhe ajo derë mbyllet. Historia e zgjerimit tregon se fatet e vendeve që duan të hyjnë në atë derë dhe vendeve që janë pas asaj dere jo gjithmonë përputhen”, u shpreh z. Rama.

Kryetari i Komisionit të Posaçëm Parlamentar “Për thellimin e reformave për mirëqeverisjen, sundimin e ligjit dhe antikorrupsionin për Shqipërinë 2030 në Bashkimin Evropian”, z. Fatmir Xhafaj theksoi se takimi synon të adresojë zhvillimet në stacionin e ri ku ka mbërritur procesi për thellimin e reformave për mirëqeverisjen, antikorrupsionin dhe sundimin e ligjit.

Duke bërë një ekspoze të punës së bërë nga ekspertët e komisionit të posaçëm dhe procesit të gjatë të konsultimit me ekspertë vendas dhe të huaj, z.Xhafaj shprehu mirënjohjen për asistencën dhe ekspertizën e dhënë nga partnerët ndërkombëtare gjatë gjithë procesit. “Ky draft plan veprimi synon të nxisë një rol shumë më proaktiv të Kuvendit, të rrisë përgjegjësinë dhe përgjegjshmërinë e tij në përmbushjen e sfidave të mëdha të integrimit dhe reformimit të mëtejshëm të vendit”, u shpreh z.Xhafaj.

Zëvendëssekretari i përgjithshëm i Këshillit të Evropës, z.Bjorn Berge në fjalën e tij theksoi mbështetjen e Këshillit të Evropës në procesin e integrimit të vendit dhe vlerësoi reformat e ndërmarra deri më tani, duke u ndalur në progresin që ka shënuar Shqipëria në sistemin e drejtësisë, luftën për parandalimin e pastrimit të parave, procesi i vetting-ut për gjyqtarët, etj.

Znj.Valentina Superti, Drejtoresha për Ballkanin Perëndimor në Drejtorinë e Përgjithshme për Zgjerimin dhe Fqinjësinë Lindore në Komisionin Evropian vlerësoi progresin e arritur në negociatat për dy grup-kapitujt dhe theksoi rëndësinë e çështjeve që kanë të bëjnë me sundimin e ligjit në avancimin e procesit të anëtarësimit drejt BE-së.

Z. Aidan Eyakuze, Drejtor Ekzekutiv i Partneritetit për Qeverisje të Hapur (OGP), nëpërmjet një video-mesazhi theksoi se Qeverisja e Hapur dhe sa më përfshirëse është themeli i demokracisë, si dhe theksoi rëndësinë e ndërmarrjes së reformave në funksion të standardeve demokratike dhe procesit të integrimit europian.

Pas ceremonisë hapëse, takimi vijoi me zhvillimin e tre paneleve, ku u diskutuan gjetjet dhe masat kryesore të planit kombëtar të veprimit për tre shtyllat objekt pune të komisionit të posaçëm: Mirëqeverisja, Antikorrupsioni dhe Sundimi i ligjit.